“Navoiyuran” — xalqaro hamkorlik doirasini kengaytirmoqda

“Navoiyuran” davlat korxonasi Xitoy Xalq Respublikasining China National Uranium Corporation Limited (CNUC) hamda China Nuclear Energy Industry Corporation kompaniyalari bilan hamkorlik shartnomasini imzoladi.

Bu hamkorlik — tabiiy uran mahsulotining eksport geografiyasini kengaytirish, xalqaro bozordagi ishonch va nufuzni yanada mustahkamlash yo‘lidagi muhim qadam bo‘ldi.

Ma’lumot o‘rnida aytish mumkinki, 2024-yil 23-yanvar kuni Pekin shahrida bo‘lib o‘tgan “Tabiiy uran ishlab chiqarish sanoati — 2023” xalqaro forumi doirasida O‘zbekiston Respublikasi Tog‘-kon sanoati va geologiya vazirligi hamda China National Uranium Corporation Limited o‘rtasida o‘zaro hamkorlik kelishuvi imzolangan edi.

Kelishuvga muvofiq ushbu kompaniya tomonidan noan’anaviy turdagi uran maydonlarida geologiya-qidiruv ishlari olib borilmoqda va maydonlarni o‘zlashtirish istiqbollari ishlab chiqildi.

Bu hamkorlik nafaqat uran sanoatidagi yangi imkoniyatlarni ochib beradi, balki “Navoiyuran” DKning xalqaro nufuzini yanada yuksaltirishga xizmat qiladi.