"Zafarobod" kon boshqarmasi Navoiy va Buxoro viloyatlari hududida joylashgan bo‘lib, uning tarkibiga 1, 2, 3 va 4-geotexnologik konlari, ta'mirlash-mexanika sexi, Markaziy fizika-kimyo laboratoriyasi, elektr tarmoqlari va podstansiyalar sexi, 6-avtomobil bazasi, texnik nazorat xizmati kabi sex va bo‘linmalar kiradi.
Foydali qazilmalar Shimoliy Konimex, Janubiy Bukinay, Aulbek, Ko‘xnur, Jingeldi, Teriquduq, Sugrali va Janubiy Sugrali konlarida qazib olinadi. Bugungi kunda kon boshqarmasi zamonaviy sanoat korxonasi bo‘lib, u tog‘-kon sanoati majmualarini, barcha ishlab chiqarish ehtiyojlarini, rivojlangan infratuzilmani va ijtimoiy ob'ektlarni to‘liq qoplaydigan yordamchi ustaxonalarni o‘z ichiga oladi.
Eksportga yo‘naltirilgan mahsulotlar ishlab chiqarishni ko‘paytirish bo‘yicha davlat dasturi doirasida kon boshqarmasi tomonidan bir qator ilmiy-tadqiqot va amaliy ishlar amalga oshirildi. Bu esa ikkinchi mahsulot - ammoniy perrenati (reniy) ishlab chiqarishni 4 barobardan ko‘proq oshirishga imkon berdi. Bundan tashqari, ammoniy perrenati bir vaqtning o‘zida asosiy ishlab chiqarishning texnologik eritmalaridan olinmoqda.