“Nurlikum Mining” qo‘shma korxonasida yangi bosqich boshlandi
2025-yil sentabr oyida “Navoiyuran” davlat korxonasi, Orano Group (Fransiya) va ITOCHU Corporation (Yaponiya) kompaniyalari bilan o‘zaro hamkorlikni kengaytirgan holda, “Nurlikum Mining” qo‘shma korxonasi doirasidagi sheriklikni rivojlantirish jarayonini yakunladi.
Mazkur o‘zgarishlar 2025-yil 10-mart kuni Parij shahrida imzolangan bitimga asoslanadi. Ushbu kelishuv Navoiy viloyatining Tomdi tumanida joylashgan “Janubiy Jongeldi” uran konini sanoat miqyosida o‘zlashtirishga yo‘l ochadi.
Yangilangan tuzilma bo‘yicha “Navoiyuran” DK va Orano Group qo‘shma korxonada
45 foizdan ulushga ega bo‘ldi. Yaponiyaning ITOCHU korporatsiyasi esa qolgan ulush bilan loyiha ishtirokchisiga aylandi. Loyiha “Navoiyuran” DKning mavjud ishlab chiqarish bazasiga integratsiya qilinadi va kompaniya operatsion boshqaruvchi sifatida faoliyat yuritadi. Bu qaror ishlab chiqarish xarajatlarini kamaytirish va samaradorlikni oshirishga qaratilgan.
“Janubiy Jongeldi” loyihasi 10 yil davomida barqaror ishlab chiqarish imkonini berishi kutilmoqda. Hisob-kitoblarga ko‘ra, yiliga o‘rtacha 500 tonna uran ishlab chiqarilishi, eng yuqori darajada esa 700 tonnagacha yetishi mumkin.
Mazkur loyiha Orano va O‘zbekiston hukumati o‘rtasida 2022-yilda imzolangan strategik hamkorlik dasturining bir qismidir. Unga muvofiq, qo‘shma geologik-qidiruv ishlari olib borilib, mineral resurslar hajmini kamida ikki baravar oshirish rejalashtirilgan.
Ma’lumot uchun:
Orano – yadroviy materiallar sohasida yetakchi xalqaro operator bo‘lib, bugungi va kelajakdagi global energiya va sog‘liq bilan bog‘liq muammolarni hal qilishga qaratilgan yechimlarni taklif etadi. Kompaniya uran qazib olishdan tortib, yoqilg‘i ishlab chiqarish zanjirining barcha bosqichlarida yuqori qo‘shimcha qiymatga ega mahsulot va xizmatlarni ko‘rsatadi. Har kuni Orano guruhining 17 500 nafar xodimi o‘z bilim va tajribasini xavfsizlik, innovatsiya va resurslardan samarali foydalanish yo‘lida safarbar etmoqda.
ITOCHU – dunyodagi eng yirik savdo uylari va investitsiya kompaniyalaridan biri bo‘lib, to‘qimachilik, mashinasozlik, metall, mineral, energetika, kimyo, oziq-ovqat, ko‘chmas mulk, axborot texnologiyalari va moliya kabi ko‘plab sohalarda faoliyat yuritadi. Korporatsiya o‘z faoliyatini BMT Barqaror rivojlanish maqsadlariga moslashtirish, bozor, jamiyat va iste’molchilar manfaatlarini inobatga olgan holda loyihalar amalga oshirish siyosatini davom ettirmoqda. ITOCHU barqaror energiya o‘tishi va karbon neytrallikka erishishga hissa qo‘shuvchi loyihalarni qo‘llab-quvvatlaydi.