Energetik infratuzilmani raqamlashtirish orqali korrupsiyani kamaytirish imkoniyatlari

Korxonada energetika sohasini modernizatsiya qilish, energiya resurslaridan samarali foydalanishni ta’minlash va ish jarayonlarining shaffofligini oshirish maqsadida bir qator raqamli loyihalar amalga oshirildi.

Mazkur ishlar korrupsiya xavflarini kamaytirish va nazorat tizimini kuchaytirishga qaratilgan davlat dasturlariga muvofiq bajarildi. Raqamlashtirish doirasida amalga oshirilgan ishlarga to‘xtaladigan bo‘lsak, avvalo, elektroenergiyani avtomatlashtirilgan hisobga olish tizimi joriy etildi.  Buning uchun asosiy iste’mol nuqtalarda ma’lumotlar real vaqtda markaziy bazaga uzatiladigan intellektual hisoblagichlar o‘rnatildi, hisob ma’lumotlariga qo‘lbola aralashuv imkoniyati to‘liq bartaraf etildi.

Hisobot va nazorat jarayonlari to‘liq raqamlashtirildi. Ya’ni, energiya resurslarini hisobga olish bo‘yicha barcha hisobotlar avtomatik rejimida shakllantiriladigan yagona elektron ma’lumotlar bazasi yaratildi, rahbariyat va nazorat organlari ma’lumotlarga to‘g‘ridan-to‘g‘ri onlayn kirish imkoniyati yaratildi. Shaffoflikni ta’minlash va korrupsiya xavflarini kamaytirish choralari ko‘rildi. Xususan, barcha tenderlar va shartnomalar amaldagi qonunchilikka muvofiq tekshiriladi hamda elektr jihozlari va materiallar xaridi davlat elektron platforma orqali amalga oshiriladi.

Energiya ma’lumotlarining haqqoniyligini nazorat qilish uchun ichki audit tizimi joriy etildi. Bundan tashqari, xodimlar malakasi oshirildi, muhandis-texnik xodimlar raqamli hisob tizimlari bilan ishlash bo‘yicha o‘qitildi, raqamli platformalardan foydalanish va ma’lumotlarni muhofaza qilish uchun mas’ul mutaxassislar tayinlandi.

Buning natijasida joriy etilgan raqamli texnologiyalar energiya yo‘qotishlarini kamaytirdi, inson omili va korrupsiya ehtimolini minimallashtirdi, energiya iste’molini tahlil qilish va rejalashtirish samaradorligi oshdi, ish jarayonlarining shaffofligi va mas’uliyati kuchaytirildi.

Baxtiyor Rahmatov, “Navoiyuran” DK bosh energetigi