“Navoiyuran”da kadrlarni tanlashda shaffoflik va adolatlilik – barqaror rivojlanishning asosiy omili
Jahon miqyosida iqtisodiy barqarorlikka erishishda korrupsiyaga qarshi kurashish strategik ustuvor yo‘nalishlardan biri bo‘lib qolmoqda. Bugungi globallashuv sharoitida resurslarga talab ortib borayotgan bir paytda davlat boshqaruvida shaffoflik, hisobdorlik va adolatga asoslangan tizimni joriy etish mamlakatlar taraqqiyotining ajralmas sharti sifatida qaralmoqda.
O‘zbekiston ham mazkur yo‘nalishda izchil islohotlarni amalga oshirib kelmoqda. Xususan, O‘zbekiston Respublikasi Prezidenti boshchiligidagi tizimli islohotlar barcha tarmoqlar qatorida uran sanoatida ham shaffof boshqaruv va korrupsiyaga qarshi qat’iy nazoratni joriy etishga xizmat qilmoqda. Prezidentning 2021-yil 6-iyuldagi PQ-5177-sonli qarori davlat ulushi 50 foiz va undan ortiq bo‘lgan korxonalarda ishga qabul jarayonlarini faqat ochiq tanlov asosida amalga oshirishni belgilab bergani mazkur yo‘nalishda muhim huquqiy asos bo‘lib xizmat qilmoqda.
“Navoiyuran” davlat korxonasida yangi quvvatlar ishga tushirilishi bilan birga kadrlar bozorida ham talab ortib bormoqda. Bo‘sh ish o‘rinlariga nomzodlarni tanlab olishda tanish-bilishchilik, mahalliychilik yoki inson omiliga bog‘liq subyektiv qarorlarning oldini olish maqsadida korxona tomonidan ishga qabul jarayoni to‘liq ochiq va raqamlashtirilgan tizimga o‘tkazildi.
Shu maqsadda, nomzodlar hujjatlarini masofadan turib topshirish imkonini beruvchi maxsus elektron platforma – https://mehnat.navoiyuran.uz/ ishga tushirildi.
Ushbu platforma bir vaqtning o‘zida bir nechta dolzarb vazifalarni hal etadi. Xususan, hujjat topshirishni soddalashtiradi va tezlashtiradi, barcha arizachilar uchun teng imkoniyat yaratadi, inson omiliga bog‘liq subyektiv qarorlar, noto‘g‘ri talqinlar yoki korrupsion xavflarni kamaytiradi, nomzodning kasbiy bilim va malakasini standartlashtirilgan testlar orqali baholash imkonini beradi.
Natijada korxonaga ishga kirish istagida bo‘lgan har bir nomzod ro‘yxatdan o‘tib, o‘z hujjatlarini onlayn tarzda yuborishi, tanlov sanalari haqida o‘z vaqtida xabardor bo‘lishi va test jarayonida o‘z imkoniyatlarini adolatli tarzda namoyon etishi mumkin.
Shuningdek, mavjud bo‘sh ish o‘rinlari haqidagi yangiliklar “Navoiyuran” DKning rasmiy sayti https://navoiyuran.uz/ orqali ham muntazam e’lon qilib borilmoqda. Bugun bu kabi elektron platformalar adolatli tanlov tizimining markaziga aylanib bormoqda.
Korrupsiyaga murosasiz munosabat – uran sanoatining kelajagi uchun mustahkam negizdir. Zero, “Navoiyuran” davlat korxonasida bugun korrupsiyaga qarshi qat’iy siyosat, oshkoralik va hisobdorlik tamoyillari asosiy boshqaruv mezoniga aylangan. Kadrlarni tanlash jarayonini raqamlashtirish – nafaqat qulaylik va soddalik, balki korxonaning umumiy boshqaruv madaniyatini yangi bosqichga ko‘targan amaliy natijadir.
Adolatli tanlov orqali shakllanayotgan professional jamoa ishlab chiqarish samaradorligini oshiradi, xavfsizlik va texnik intizomni kuchaytiradi, xalqaro standartlarga mos boshqaruv tamoyillarining joriy etilishiga xizmat qiladi, uran sanoatining xalqaro nufuzini mustahkamlaydi.
Bugun “Navoiyuran” DK tomonidan amalga oshirilayotgan ochiq va shaffof kadrlar siyosati nafaqat korxona miqyosida, balki mamlakatimiz iqtisodiyotining barqaror rivojlanishiga ham xizmat qilmoqda. Zamonaviy texnologiyalar asosida yo‘lga qo‘yilgan bu tizim korrupsion xavflarni bartaraf etish, malakali kadrlar salohiyatidan to‘liq foydalanish hamda korxona oldiga qo‘yilgan yirik maqsadlarni amalga oshirishda muhim omil bo‘lib qolmoqda.
Sh.Sh. Ismoilov, Kadrlar bo‘limi boshlig‘i v.b.
J.F. Sharipov, Kadrlarni qidirish va tanlash bo‘limi boshlig‘i v.b