“ROSATOM” VAKILLARI “NAVOIYURAN”DA BO‘LISHDI
“Navoiyuran” DK hamda Rossiya Federatsiyasi “Rosatom” davlat korporatsiyasi tarkibiga kiruvchi “Texsnabeksport” va “Uranium One Group” AJ o‘rtasida 2024-yil 26-mart kuni imzolangan hamkorlik bitimiga asosan korxonalar o‘rtasida o‘zaro malaka oshirish, korxonalar faoliyatida qo‘llanilayotgan texnologik jarayonlar bilan tanishish belgilangan.
Ushbu hamkorlik kelishuviga muvofiq “Dalur” AJ bilan o’zaro malaka oshirish maqsadida joriy yilning iyul oyida “Navoiyuran” DK vakillari xizmat safarida bo‘lishgan edi.
Bu gal “Dalur” AJ vakillari “Navoiyuran” DK faoliyatida qo’llanilayotgan texnologik yechimlar bilan tanishish maqsadida korxonaga tashrif buyurishdi.
Dastlab tashrif dasturiga asosan “Navoiyuran” DK mutaxassislari bilan uchrashuv tashkil etildi. Muloqotlar davomida korxona faoliyati haqida ma’lumot berildi hamda uran mahsulotini ishlab chiqarish bilan bog‘liq masalalar o‘zaro muhokama etildi.
Shundan so‘ng, xorijlik mutaxassislar ishlab chiqarishning texnologik jarayonlari bilan tanishish maqsadida bir qator geotexnologik konlarda bo‘lishdi. Xususan, “Uchquduq” geotexnologik konining ishlab chiqarish quvvatlari o‘rganildi, shuningdek, “Zafarobod” KB 4-geotexnologik konining uran va reniy ishlab chiqarish quvvatlari ko‘zdan kechirildi hamda mahalliy mutaxassislar bilan muloqot qilindi.
Yakunda korxonalar o‘rtasida o‘zaro malaka oshirish ishlarini davom ettirishga kelishib olindi.
“Navoiyuran” DK axborot xizmati
