“Navoiyuran” DK 2025-yil yakuni bo‘yicha dastlabki natijalarni e’lon qiladi

Tushumning o‘sishi, kuchli pul oqimi va aktivlarning izchil rivojlanishi

“Navoiyuran” davlat korxonasi (keyingi o‘rinlarda – “Kompaniya”), dunyodagi eng yirik uran qazib oluvchi kompaniyalardan biri hamda past tannarxli yetakchi ishlab chiqaruvchilardan biri sifatida, 2025-yil
31-dekabrda yakunlangan yil bo‘yicha (keyingi o‘rinlarda – “Hisobot davri”) auditdan o‘tmagan dastlabki natijalarini e’lon qiladi. Amaldagi tartibga muvofiq, Kompaniya Hisobot davri uchun to‘liq moliyaviy hisobotni va mustaqil auditorlarning xulosasini 2026-yil may oyida e’lon qiladi.

Hisobot yilida global bozorda tabiiy uranning muhim yetkazib beruvchisi bo‘lgan Kompaniya kuchli operatsion va moliyaviy natijalarni namoyon etib, rekord darajadagi tushumga erishdi. Ko‘rsatkichlarning o‘sishi ishlab chiqarish hajmlarining 35% ga oshishi hamda aktivlarni rivojlantirishga yo‘naltirilgan uzluksiz investitsiyalar hisobiga ta’minlandi, bu esa zaxiralar hajmining 52% ga oshishiga olib keldi.

Asosiy ko‘rsatkichlar

Moliyaviy ko‘rsatkichlar

• Tushum $1 112 mln ga yetdi, bu 2024-moliyaviy yil ko‘rsatkichiga ($925 mln) nisbatan 20,2% ga yuqori.
• Moslashtirilgan EBITDA $624 mlnni tashkil etdi va o‘tgan yilgi $609 mln darajadan yuqori bo‘ldi (+0,33%).
• Moslashtirilgan sof foyda $472 mlngacha oshdi, bu bir yil avvalgi $471 mln ga nisbatan (+0,21%).
• CAPEX (2025) – $551 mln: $322 mln – konlarni o‘zlashtirish, $162 mln – asosiy vositalarni (PPE) xarid qilish, $67 mln – geologik qidiruv va baholash ishlari.
• Erkin pul oqimi 59,7% ga oshib, $288 mln dan $460 mlnga yetdi.
• Umumiy pul xarajatlari (TCC) – 1 funt U₃O₈ uchun $27.
• Jami qo‘llab-quvvatlovchi pul xarajatlari (AISC) – 1 funt U₃O₈ uchun $35.
• Sof qarz $72 mlnni tashkil etadi.
• Sof qarzning EBITDAga nisbati – 0,12x.

Operatsion ko‘rsatkichlar

• Ishlab chiqarish hajmi 35% ga oshib, 7 000 tonnaga yetdi (2024-moliyaviy yilda: 5 200 tonna).
• Uranning o‘rtacha realizatsiya narxi – 1 funt U₃O₈ uchun $69,5.
• Uran zaxiralari (JORC kodeksiga muvofiq): 2024-yilda 63,4 ming tonnaga nisbatan 2025-yilda 96,6 ming tonna (+52%)*.
• Mineral resurslar (JORC kodeksiga muvofiq): 2024-yilda 52,2 ming tonnaga nisbatan 2025-yilda 53,9 ming tonna (+3%)*.

*2026-yil 1-yanvar holatiga ko‘ra SRK Consulting tomonidan tayyorlangan mineral resurslar va foydali qazilma zaxiralari to‘g‘risidagi hisobot asosida.

Strategik ustuvor yo‘nalishlar

• Kompaniyaning mineral-xomashyo bazasini faol geologik qidiruv ishlari va aktivlarni rivojlantirish hisobiga kengaytirishni davom ettirish.
• Qizilqoq va Arnasoy konlarini o‘z ichiga olgan holda yangi konlarni o‘zlashtirishda erishilgan taraqqiyot, shuningdek kislorodli va karbonatli eritib olish texnologiyalarini joriy etish.
• Xalqaro hamkorlikni mustahkamlash va global sanoat ishtirokchilari bilan faol hamkorlikni davom ettirish, bu esa “Navoiyuran”ning yadroviy yoqilg‘i yetkazib berish zanjiridagi pozitsiyalarini yanada mustahkamlashga xizmat qiladi.

“2025-yilda kompaniyamiz kutilgan natijalarga muvofiq tushumning sezilarli o‘sishini namoyon etdi, shu bilan birga aktivlarni rivojlantirish va zaxiralarni oshirishga investitsiyalarni davom ettirdi.

Ishlab chiqarish hajmlarini oshirish va kengaytirish, shuningdek zamonaviy qazib olish texnologiyalarini qo‘llash orqali ishlab chiqarish samaradorligini oshirishga qaratilgan e’tiborimiz yuqori moliyaviy natijalarni ta’minlamoqda hamda tabiiy uranga bo‘lgan ortib borayotgan talabni qondirishga yo‘naltirilgan barqaror o‘sish uchun mustahkam asos yaratmoqda.

Global talabning izchil o‘sishi sharoitida “Navoiyuran” tabiiy uranning yuqori samarador va ishonchli yetkazib beruvchisi sifatidagi yetakchi pozitsiyalarini mustahkamlab bormoqda. Bizning ustuvor yo‘nalishlarimiz – aktivlarni rivojlantirish, zaxiralarni o’stirish, ilg‘or zamonaviy qazib olish texnologiyalarini qo‘llash hamda xalqaro hamkorlikni mustahkamlashdan iborat” – deb ta’kidladi “Navoiyuran” bosh direktori Fayzullayev Djamal Sabaxonovich.

Operatsion sharh

Hisobot davrida “Navoiyuran” o‘zining butun resurs bazasi bo‘ylab ishlab chiqarish hajmlarini oshirishni davom ettirdi, bunga yer osti eritib olish (ISR) operatsiyalarining izchil rivojlanishi xizmat qildi.

Kompaniya bir qator konlarda loyihalarni amalga oshirishda sezilarli taraqqiyotga erishdi, jumladan Qizilqoq va Arnasoy konlarida tayyorgarlik ishlari olib borildi, shuningdek amaldagi quduqlar maydonlarini optimallashtirish davom ettirildi. Shu bilan birga, “Navoiyuran” kislorodli va karbonatli eritib olish texnologiyalarini joriy etishni jadallashtirdi, bu esa operatsion samaradorlikni oshirish hamda sulfat kislotasi narxlarining o‘zgaruvchanligiga bog‘liqlikni kamaytirishga xizmat qiladi.

Prognoz

Istiqbolda “Navoiyuran” shakllangan operatsion baza va xalqaro sanoat ishtirokchilari bilan uzoq muddatli hamkorlikka tayangan holda ishlab chiqarish va tushum ko‘rsatkichlarining barqaror darajada saqlanishini kutmoqda.

Kompaniya mineral-xomashyo bazasini kengaytirish, Qizilqoq va Arnasoyni o‘z ichiga olgan asosiy rivojlanish loyihalarini amalga oshirish, shuningdek operatsion samaradorlik va barqarorlikni oshirish maqsadida yangi avlod eritib olish texnologiyalarini joriy etishga ustuvor ahamiyat qaratishda davom etadi.

“Navoiyuran” shuningdek o‘zining ESG strategiyasiga sodiqligini saqlab qoladi, jumladan iqlim bilan bog‘liq tashabbuslarga investitsiyalarni davom ettirish hamda uzoq muddatli dekarbonizatsiya maqsadlariga erishish yo‘lida izchil harakat qiladi.

Aloqa uchun:

Hudson Sandler – Xalqaro OAV

nu@hudsonsandler.com

“Navoiyuran” davlat korxonasi haqida 

“Navoiyuran” dunyodagi eng yirik uran qazib oluvchi hamda past tannarxli yetakchi ishlab chiqaruvchilardan biri bo‘lib, O‘zbekiston Respublikasining Navoiy viloyatida joylashgan. Hozirgi kunda Kompaniya uran qazib olish hajmi bo‘yicha dunyoda 6-o‘rinni egallaydi, 43 ta uran konini boshqaradi hamda umumiy hajmi 151,1 ming tonna uranni tashkil etuvchi resurs bazasiga ega, shundan qariyb 96,6 ming tonnasi JORC standartlariga muvofiq tasdiqlangan zaxiralardir. Kompaniya resurs bazasini izchil kengaytirish bo‘yicha barqaror o‘sish sur’atlarini namoyon etmoqda.

“Navoiyuran” O‘zbekistonning konchilik sanoatida va global yadroviy yoqilg‘i yetkazib berish zanjirida strategik ahamiyatga ega bo‘lib, uran ishlab chiqarishning barqarorligini ta’minlaydi hamda mamlakatning ushbu bozordagi yetakchi pozitsiyalarini qo‘llab-quvvatlaydi.